Aínda co bo sabor de boca do Womex nos beizos, entramos na antesala do Santiago(é)Tapas. Queremos felicitar, antes de nada, aos organizadores deste evento profesional que converteu a Compostela durante a semana pasada nunha babelia multicultural de primeira orde e que xerou un enorme retorno para a cidade, favorecendo ademais a proxección exterior de Galicia no mundo e o noso orgullo como capital dun país cheo de enormes potencialidades. Bravo polo traballo ben feito, humildemente e con constacia, a pesar das moitas dificultades que tiveron que enfrontar os que fixeron posible que o Womex celebrara en Compostela o seu XX aniversario. As rúas de Compostela están feitas para escoitar falar catro ou cinco idiomas diferentes cada dez pasos. Noraboa aos que fixeron posible este miragre e parabéns á cidade pola súa hospitalidade.
Esta semana comezamos coa selección das mellores tapas que aspiran a participar nunha nova edición do Santiago(é)Tapas, o mellor concurso de cociña en miniatura de Galicia. Pasen e degusten e imos xa a polas 200.000 tapas vendidas dende que este concurso botaba a andar...
Ningún comentario:
Publicar un comentario